GEGURITAN

MARANG PARA MUDHA

J. Respati

Sedulur

Sliramu tan beda Arjuna kang manjing wana

Senajan dudu Krendhawahana

Senajan tan ingadhang raseksa

Senajan ora nganggo bandayuda

Lan sliramu beda karo Arjuna, Sedulur

Sebab tan nganthi panakawan catur

Senajan ngindhit jemparing nyangking gandhewa

Senajan nggembol krenteg sedyatama

Lemah kang kokpidak iki ingaran kutha

Awan-bengi tansah padhang mawa cahya

Nanging abang kebak angkara

Uga kuning dening nistha

Kutha iku alas gawat kaliwat

Papane denawa kang sugih akal culika

Sliramu satriya tan beda Arjuna, Sedulur

Aja bandha nekad waton ngawur

Yen mung ijen tanpa rowang bakal ajur

Kanthinen Semarmu, Garengmu, Petrukmu, Bagongmu

Tulus jujur iku Pulanggenimu

Kawicaksanan iku Gandhewamu

Buntasing kawruh iku Pasopatimu

Kapcak ing Jagad Jawa, Harian Jogja, Minggu Wage, 15 Juni 2008