Cathetan Stasiun
J. Respati
Simbok bakul, kebaya biru, wiron udhar
dagangan wayu, esem mubyar
puluhan taun
tegal sawah stasiun
isih tanggon
tuna dudu pupute lakon
Sira Cah Ayu, kaos ijo persis umurmu
dagangan anget, antri sing tuku
eman, lambe mithet jebles clanamu
iki mung stasiun
ana sing munggah ana sing mudhun
kadhang sumringah kadhang muwun
Simbok bakul mapag surup
nyangklong tatu erem ngindhit bathi njarem
lakune jejeg netrane murub lathine mesem atine marem
durung tutug lakonmu
iki mung stasiun
mesema, Cah Ayu
Lempuyangan, 14 Oktober 2007
Harian Jogja, Minggu Kliwon, 6 Juli 2008
Tidak ada komentar:
Posting Komentar