MARANG PARA SARJANA
Sugito HS
mesthine kowe durung lali
lemah iki sing nggembol kakang kawah adhi ari-ari
lemah garing sadawane mangsa gilir-gumanti
kekejer tanpa luh ngrantu tekaning janji
tilingna! tangise durung mendha
nggogrogke gegodhong melu nelangsa
mesthine padha gela cuwa lara
gegadhangane teka tanpa nyangking apa-apa
kudune kowe isin wirang
saben endhang kledhang-kledhang tanpa cangkingan
dheweke mung butuh dipaelu
ora nagih wales budimu
saben rendheng parine gabug
pendhak ketiga panen bledug
dheweke welas sedhih nggrantes
bapak ibu tangga sedulurmu ngenes
mumpung kowe teles
kawruhmu wis teges
noleha mburi matega aji
mbengkas sangga-runggi miyak jati dhiri
sentosa ndhadha asung karya
iki darma!
Jogja, Oktober 2007
Tidak ada komentar:
Posting Komentar