Geguritan

REMBULAN KIJENAN

J. Respati

angin mlayu ngulon
nututi angslupe srengenge
manuk mabur ngulon
bali ing susuhe
rembulan ing burine

beda
bocah-bocah kelangan cakepan
rembulan kijenan

simbah cuwa
lelawa gumrudug ngetan
mbebeda rembulan kijenan

adhem
amem
sidhem
rembulan kijenan


KIDUNG TALU

J. Respati

Seksenana, Cah Ayu
Wong Lanang sawega mbundheli prasapa
Lumantar cempala ing tangan kiwaku
bakal dhinodhog korining rahayu temah binuka
Lumantar urubing blencong ing ndhuwur sirahku
bakal sinapu sakehing rubeda ing marga
Lumantar gedebog ing ngarep dhadhaku
bakal tinanceb jejeg gegaraning gantha

Seksenana, Cah Ayu
Gong wis muni
Laku sinartan puja santi
Keprak bakal muni
Tilas tapak bakal dadi prasasti
Wewayangan katon ing buri
Wong lanang durung mati

Seksenana, Cah Ayu
Senajan jagat kumel-kucem
Senajan manungsa angel mesem
Kelir iki kudu tansah putih resik
Lakon iki kudu tansah mulang becik

Seksenana, Cah Ayu
Wong Lanang suthik lincat janji


Harian Jogja, Minggu Paing, 8 Juni 2008